الخميس، 7 أغسطس 2008

الناس طلعت بتقرا فعلا.....!


علي فكرة

ساعات الواحد بيبقي عنده قناعة كده ان الناس مش بتقرا ومحدش مهتم.. وايشوف ان فيه ناس كتيرة درجة تواجدهم إعلاميا لا تتناسب مع درجة موهبتهم .. فبيستسهل بقي ويقول خلاص مش لاعب .. شخصيا وقعت في المشكلة دي لوقت مش قليل . لكني دلوقتي شايفاها حالة سلبية ..
رغم بعدي عن مصر لكني حاسة بحراك ثقافي وفكري محترم .. وحاسة ان الشباب كمان بدأوا يتواجدوا بقوة بعد فترات طويلة من الانقماع تحت سيطرة دور النشر الكبيرة والأسماء الاعلامية اللي لها وزنها ..
تقريبا اللي حصل في الكتابة زي اللي حصل مع الأغاني والأفلام - مع بعض الفوارق - شكرات الإنتاج المتحمسة للشباب و بتروج لهم عشان تكسب من وراهم أتاحت الفرصة لناس عندهم موهبة حقيقية انهم يظهروا وينتشروا ..صحيح في المقابل الدنيا بقت زحمة بالمئات من المدعين .. لكن ده لا ينفي الجانب الإيجابي ..
متهيألي ده يشبه لحد كبير دور النشر والصحف الخاصة دلوقتي ..
الفكرة الأغرب بقي اني كنت في مصر فاكرة ان الناس اللي في الخليج دول لا علاقة لهم بالكتاب أبدا
يمكن دي الصورة اللي بتروج لها وسائل الاعلام عندنا .. بس الحقيقة غير كده
فيه رواج هايل في سوق الكتاب .. مش هاقول ان كل الكتب لها قيمة أدبية عالية .. لأ ممكن بس الحكاية تكون تفاصيل وحواديت عن المجتمع وخصوصيته .. لكن ده برضه مش وحش .. ده ممكن يفتح الباب لتطور إبداعي أكبر ..
اللي حصلي شخصيا كان مفاجأة .. نزول خبر طباعة المجموعة في الصحف ده كان تم عن طريق دار النشر لأنه بيعتبروا ده شغلهم .. لكن اهتمام الصحفيين اللي راسلتهم علي الإيميل بشكل شخصي هو اللي أثار إعجابي فعلا ..
المهم ..الطبعة الأولي خلصت الحمد لله وباستعد لنزول الطبعة التانية ..
ساعات الدنيا برضه مابتديكش كتفها قوي

هناك 7 تعليقات:

شادي أصلان يقول...

الف الف الف مبروك
واتمني ان حالة الحراك الثقافي دي تزيد وتستمر
بس للأسف هي ليها شورط كتير مؤثرة مش موجودة عندنا هنا في مصر
وطبعا انتي عارفة معظم الظروف دي

رحاب إبراهيم يقول...

شادي الجميل
متشكرة لمرورك واهتمامك
انا شايفة ان الحراك الثقافي في مصر متوهج جدا بسبب دور النشر الجديدة والصحف المستقلة .. ده ماكانش موجود بشكل واضح من عشر سنين مثلا ..
تمنياتي لك بدوام الابداع

هويدا صالح / عشق البنات يقول...

رحاب يا قمر مبروك يا ستي
لازم اقرأ مش معقول كده

رحاب إبراهيم يقول...

الجميلة والدافئة جداااااا
هويدا صالح
نورت المدونة بوجودك
لازم تقري طبعا ..ده يشرفني .
ان شاء الله نكون متواجدين في معرض الكتاب .
لك كل الحب

بنوتة مصرية يقول...

دكتورة رحاب
أحييك
وألف مبروك
بالتوفيق يا رب

رحاب إبراهيم يقول...

بنوتة مصرية

اشتقنا لك يا بنوتة
الحمد لله الدنيا صغيرة علي أي حال
نورتي المدونة وشكرا لك

fawest يقول...

أنتِ مش كنتى موعدانى بنسخة؟؟؟؟؟؟؟؟؟